Lúðvík Bergvinsson (andsvar):
Virðulegi forseti. Mér fannst hv. þm. Halldór Blöndal gera mér fullhátt undir höfði í ræðu sinni en tek það hól sem hann sendi mér. En mig langaði aðeins í þessari umræðu vegna þess að hv. þm. byrjaði ræðu sína á því að fjalla um þingbundna stjórn og mátti skilja það svo að í þingræðinu felist að þingið ráði öllu. En það er ekki hugsunin í stjórnskipuninni. Þar er ríkisvaldinu skipt í þrennt, þ.e. framkvæmdarvald, löggjafarvald og dómsvald. Alþingi er síðan falið að fara með löggjafarvaldið. Í þingræðinu felst að ríkisstjórn þarf a.m.k. að njóta stuðnings eða hlutleysis meiri hluta þingsins en ekki að þingið ráði öllu. Það er því einhver misskilningur á floti í máli hv. þm. Ég vildi aðeins koma þessu á framfæri þannig að þeim misskilningi yrði eytt.
Hvað það varðar að ég hafi verið að gantast með orðið ,,stjórnskipunarkreppa`` þá er langur vegur frá því. Ég var hins vegar (Forseti hringir.) að spyrja hv. þm. um rökstuðning fyrir því hvers vegna menn notuðu orðið stjórnskipunarkreppa. Það hefur ekki komið fram.