Ferill 264. máls. Aðrar útgáfur af skjalinu: PDF - Word Perfect.
148. löggjafarþing 2017–2018.
Þingskjal 903 — 264. mál.
2. umræða.
Breytingartillaga
við frumvarp til laga um endurnot opinberra upplýsinga.
Frá stjórnskipunar- og eftirlitsnefnd.
1. Við 1. gr. bætist ný málsgrein, svohljóðandi:
Endurnot opinberra upplýsinga vísa til þess að einkaaðili noti slíkar upplýsingar í öðrum tilgangi en ætlunin var þegar þeirra var aflað af hálfu opinberra aðila. Miðlun upplýsinga á milli opinberra aðila í þágu starfa þeirra telst ekki til endurnota á upplýsingum í þessum skilningi.
2. Við 2. gr.
a. Á undan 1. mgr. komi ný málsgrein, svohljóðandi:
Lög þessi gilda um endurnot á fyrirliggjandi upplýsingum sem eru í vörslum stjórnvalda og almenningur á rétt til aðgangs að.
b. 5. mgr. falli brott.
c. Við 6. mgr. bætist nýr málsliður svohljóðandi: Lögin tryggja hins vegar ekki rétt til endurnota eða aðgangs að gögnum eða upplýsingum sem eru háð þagnarskyldu samkvæmt öðrum lögum.
3. Við 3. gr.
a. Á eftir 1. tölul. 2. mgr. komi nýr töluliður, svohljóðandi: Tölfræðilegra gagna sem um gildir trúnaður.
b. Í stað orðsins ,,höfundalögum“ í 2. tölul. 2. mgr. komi: lögum um vernd hugverkaréttinda.
c. Í stað orðanna ,,heimilt er að endurnota“ í 4. mgr. komi: sérstök ákvörðun hefur verið tekin um að endurnota megi.
4. Í stað orðsins ,,höfundalaga“ í 1. tölul. 4. gr. komi: laga um vernd hugverkaréttinda.
5. Á eftir orðunum „skv. 3. gr.“ í 7. gr. komi: sem ekki eru aðgengilegar til endurnota.
6. Við 8. gr.
a. Í stað orðanna „20 daga“ í 1. mgr. komi: 20 virkra daga.
b. Í stað orðanna „40 dögum“ í 2. mgr. komi: 40 virkum dögum.
7. Við 10. gr.
a. Við 1. mgr. bætist nýr málsliður, svohljóðandi: Söfnum, skjalasöfnum og bókasöfnum er þó jafnframt heimilt að taka gjald sem nemur beinum kostnaði fyrir varðveislu upplýsinganna og gerð réttindaleyfis.
b. 2. mgr. falli brott.
c. Í stað orðanna „1.–2. mgr.“ í 4. mgr. komi: 1. mgr.