Ferill 388. máls. Aðrar útgáfur af skjalinu: PDF - Word Perfect.
153. löggjafarþing 2022–2023.
Þingskjal 660 — 388. mál.
Svar
fjármála- og efnahagsráðherra við fyrirspurn frá Jóhanni Páli Jóhannssyni um útgreiðslu séreignarsparnaðar til örorku- og endurhæfingarlífeyrisþega.
Við vinnslu svarsins óskaði ráðuneytið eftir upplýsingum frá Skattinum.
1. Hversu margir örorku- og endurhæfingarlífeyrisþegar hafa óskað eftir því hjá Skattinum að útgreiðsla séreignarsparnaðar á grundvelli ákvæðis til bráðabirgða VIII í lögum um skyldutryggingu lífeyrisréttinda og starfsemi lífeyrissjóða, nr. 129/1997, sé skráð í reit 143 í skattframtali?
Í svari Skattsins er vakin athygli á að Skatturinn hafi að fyrra bragði verið búinn að ljúka við leiðréttingu í nánast öllum tilvikum í samvinnu við Tryggingastofnun ríkisins.
Í svarinu kemur fram að kærur vegna álagningar tekjuáranna 2020 og 2021, þar sem krafist var flutnings tekna úr reit 140 í reit 143, hafi alls verið 58. Fallist hafi verið á kröfu kæranda að fullu í 27 tilvikum en í 31 tilviki hafi kröfu verið hafnað.
2. Hversu margir hafa fengið slíka leiðréttingu og vegna hversu mikilla útgreiðslna? Svar óskast sundurliðað eftir útgreiðslum áranna 2020 og 2021.
Í svari Skattsins kemur fram að ekki hafi verið haldið sérstaklega utan um fjárhæðir útgreiðslna að baki leiðréttingunum. Þá greinir að fjöldi leiðréttinga sem búið sé að framkvæma sé eftirfarandi:
Vegna tekjuársins 2020 | 10.780 einstaklingar |
Vegna tekjuársins 2021 | 9.515 einstaklingar |
3. Hversu mörgum hefur verið synjað um slíka leiðréttingu og vegna hversu mikilla útgreiðslna? Svar óskast sundurliðað eftir útgreiðslum áranna 2020 og 2021.
Í svari Skattsins kemur fram að synjanir vegna tekjuársins 2020 hafi verið 31 tilvik og að í engu tilviki hafi verið synjað vegna tekjuársins 2021. Fram kemur að ekki hafi verið haldið sérstaklega utan um fjárhæðir útgreiðslna.