Ferill 674. máls. Aðrar útgáfur af skjalinu: PDF - Word Perfect.
154. löggjafarþing 2023–2024.
Þingskjal 1144 — 674. mál.
Svar
dómsmálaráðherra við fyrirspurn frá Ásthildi Lóu Þórsdóttur um nauðungarsölu.
1. Hversu oft á ári hverju árin 2013–2023 fór nauðungarsala á fasteign fram á almennum markaði og hversu oft fór nauðungarsala á fasteign fram með uppboði á sama tímabili?
Eftirfarandi upplýsingar eru fengnar úr starfskerfi sýslumanna, Sýslu, með vélrænni talningu í samstarfi við sýslumannaráð. Samtals voru gefin út 4.140 afsöl vegna fasteigna sem seldar voru á framhaldsuppboði á árunum 2013–2023. Á sama tímabili voru gefin út átta afsöl vegna fasteigna sem seldar voru nauðungarsölu á almennum markaði.
Sérstök athygli er vakin á því að tölfræði embættis sýslumannsins á Vesturlandi var ekki aðgengileg í Sýslu fyrir árin 2013 og 2014. Núverandi embætti sýslumanna tóku til starfa hinn 1. janúar 2015 á grundvelli laga nr. 50/2014, um framkvæmdarvald og stjórnsýslu ríkisins í héraði. Upplýsingar frá þessum tíma virðast ekki hafa verið færðar yfir í Sýslu úr fyrra málaskrárkerfi og eru því ekki aðgengilegar embætti sýslumannsins á Vesturlandi.
Neðangreint er sundurliðun á framangreindum svörum eftir árum.
| Alm. sala | Uppboð | |
| 2013 | 0 | 1459 |
| 2014 | 0 | 608 |
| 2015 | 1 | 722 |
| 2016 | 1 | 589 |
| 2017 | 2 | 246 |
| 2018 | 1 | 114 |
| 2019 | 1 | 123 |
| 2020 | 0 | 112 |
| 2021 | 1 | 83 |
| 2022 | 1 | 48 |
| 2023 | 0 | 36 |
| Samtals | 8 | 4140 |
2. Hversu oft á ári hverju árin 2013–2023 neituðu sýslumenn beiðni gerðarþola nauðungarsölu um að fasteign yrði seld á almennum markaði?
Eftirfarandi upplýsingar eru fengnar með yfirferð gagna úr starfskerfi sýslumanna, Sýslu, í samstarfi við Sýslumannaráð. Á tímabilinu 2013–2023 var, samkvæmt fyrirliggjandi upplýsingum, beiðni gerðarþola nauðungarsölu um sölu á almennum markaði aldrei synjað.
3. Hversu oft voru fasteignir seldar á nauðungaruppboði fyrir lægra verð en sem nam fasteignamati á ári hverju árin 2013–2023?
Umbeðnar upplýsingar eru ekki aðgengilegar úr starfskerfi sýslumanna, Sýslu. Þá er jafnframt bent á að upplýsingar um fasteignamat eru hvorki sóttar úr fasteignaskrá né skráðar sérstaklega inn í starfskerfi sýslumanna við nauðungarsölu. Skýrist það af því að fasteignamat er ekki meðal þess sem fram kemur í beiðni um nauðungarsölu, sbr. 11. gr. laga nr. 90/1991, um nauðungarsölu.
