15.12.1986
Efri deild: 19. fundur, 109. löggjafarþing.
Sjá dálk 1707 í B-deild Alþingistíðinda. (1442)

251. mál, almannatryggingar

Heilbrigðis- og tryggingamálaráðherra (Ragnhildur Helgadóttir):

Frú forseti. Það frv. sem ég mæli hér fyrir er eitt þeirra sem flutt eru árlega um þetta leyti og hefur verið svo frá 1975 er sveitarfélögum var gert skylt á árinu 1976 að taka meiri þátt í kostnaði sjúkratrygginga en verið hafði. Miðaðist upphæðin í fyrstu við 1% álag á gjaldstofn útsvara. Tilgangurinn með aukinni hlutdeild sveitarfélaga var fyrst og fremst sá að auka aðhald í sjúkrahúsarekstri á þeirra vegum, en gjaldið rennur til þess reksturs. Þegar á árinu 1978 var ákveðið að hækka gjaldið í 2% af gjaldstofni álagðra útsvara. Á árinu 1979 var sjúkratryggingagjaldið 1,5% af ákveðnum lágmarkstekjum og 2% af því sem umfram var. Hélst sú skipan óbreytt til 1982 er ákveðið var að innheimta eingöngu gjald af þeim sem höfðu ákveðnar lágmarkstekjur og var upphæðin miðuð við 2% af þeim tekjum er umfram voru. Hefur svo verið síðan og aðeins þurft að breyta upphæð gjaldstofns í samræmi við launaþróun milli ára. Samkvæmt spá Þjóðhagsstofnunar um launabreytingar milli áranna 1985 og 1986 má reikna með 31% hækkun. Tekur frv. mið af þeirri tölu.

Ég legg til, frú forseti, að frv. verði að lokinni 1. umr. vísað til hv. heilbr.- og trn. og til 2. umr. um leið og ég undirstrika það að í frv. eru þær einar breytingar fólgnar að lagt er til að gjaldstofn sjúkratryggingagjalds, þ.e. sú upphæð sem ekkert gjald skal leggjast á, hækki úr 403 þús. kr. í 528 þús. kr. Gert er ráð fyrir að gjaldið ásamt eftirstöðvum nemi 305 millj. kr. Það er ljóst að þetta mál er bundið við áramót og þess vegna leyfi ég mér að óska þess að hv. nefnd og hv. deild sýni sömu lipurð og undanfarin ár í afgreiðslu máls eins og þessa.