Matvælarannsóknir hf.
Hæstv. forseti. Ég vona að orð hæstv. forsætisráðherra gangi eftir og þetta verði til þess að efla starfsemi úti um landið en ekki draga úr henni. Hins vegar hræða auðvitað sporin í fortíðinni um það að menn fari þá leið að til að tryggja hagnað og afkomu í rekstri þessa fyrirtækis, sem er beinlínis ætlast til miðað við greinargerð frumvarpsins, verði leitast við að færa þetta til samþjöppunar á einn eða tvo staði. Það þýðir þá einfaldlega að sú litla starfsemi, en ágæta, sem víða hefur verið rekin úti um landið verði hreinlega lögð af og sameinuð í stærri einingar þar sem verið er að leita rekstrarhagkvæmninnar og að þjónusta e.t.v. úti um landsbyggðina breytist verulega, ég tala nú ekki um þau störf sem þar hafa verið í boði.