ríkisábyrgð á lántöku Tryggingarsjóðs innstæðueigenda og fjárfesta.

Virðulegi forseti. Hæstv. fjármálaráðherra kom í þennan ræðustól og viðurkenndi algjöra uppgjöf stjórnvalda í málinu. Gott og vel. Það sem ég tel hins vegar hafa verið ómaklegt og lítilmannlegt er að kenna öllum öðrum en sér sjálfum um þá niðurstöðu sem við munum glíma við á næstu dögum og vikum.

Stjórnvöld síðasta haust samþykktu ekki Icesave-samningana. Það lá fyrir í fjárlaganefnd og hér fyrir framan mig situr fyrrverandi hæstv. viðskiptaráðherra. Hans orð ber ekki að túlka þannig að við höfum á þeim tíma samþykkt Icesave-samningana.

Við skulum hafa eitt í huga, hæstv. fjármálaráðherra lagði hér fyrir þingið í vor einhverja glæsilegustu niðurstöðu, eins og hann orðaði það sjálfur. En hvað? Auðlindir okkar voru settar að veði, hluti af gjaldeyrisvaraforða (Forseti hringir.) þjóðarinnar.