stjórn fiskveiða.
Frú forseti. Þá heyrist mér sem við hv. þm. Sigurður Ingi Jóhannsson séum sammála. Við erum sammála um að það er farsælast að menn gangi fram af rósemi og ábyrgð í þessari umræðu. Þær yfirlýsingar sem þingmaðurinn vísar til sem hafa verið tengdar þessari skötuselsumræðu eru í raun og veru um grundvallarstefnumótun. Það er allt önnur umræða, það er í raun og veru umræða um framtíðarskipan fiskveiðistjórnar, mál sem varðar stefnuna sem stjórnarflokkarnir báru fram í síðustu kosningum, lofuðu að yrði framfylgt og fengu umboð til. Það er náttúrlega þörf umræða, en hún er á öðrum vettvangi og á að vera á öðrum vettvangi.
Ég tek líka undir það með þingmanninum að harkan í umræðunni hefur verið allt of mikil. Þar hafa náttúrlega leikið sitt hlutverk hótanirnar sem fram hafa verið bornar af LÍÚ, t.d. formleg ályktun stjórnar LÍÚ um að sigla flotanum í land, formlegar ákvarðanir um að fara í áróðursherferð með blaðaskrifum, kynningarritum o.fl. Þarna er harkan. Og ókyrrðin er þarna. Það væri gott ef menn gætu lagst á eitt og stjórnmálamenn gætu kannski aðstoðað við að kyrra þessa umræðu aðeins með því að leggja gott til í henni og hvetja menn til að ganga fram af meiri ábyrgð en verið hefur.