fjárreiður ríkisins.
Forseti. Ég vil þakka hv. þm. Kristjáni Þór Júlíussyni fyrir ræðu hans og framlagningu þessa frumvarps sem er um margt ágætismál. Maður getur velt þeirri spurningu upp af hverju þeir sem á undan okkur hafa gengið hafa ekki hert á þessum reglum og lögum sem þó eru í gildi m.a. um ráðherraábyrgð og lög um réttindi og skyldur starfsmanna ríkisins og fjárreiður ríkisins sem eru orðnar ára- og sumar áratugagamlar leikreglur, hvers vegna þær hafi ekki verið teknar fyrr til endurskoðunar.
Það er rétt, sem kemur fram í frumvarpinu, að gríðarlegt agaleysi hefur ríkt gagnvart fjárheimildum eins og fram kemur í greinargerð með frumvarpinu og kom fram í máli þingmannsins áðan. Þó að staðan sé að skána hvað það varðar, eins og hv. þingmaður benti réttilega á, er full þörf á því að skerpa reglurnar um þessi mál og herða þær í þeim anda sem hér kemur fram. Ég hvet líka til þess að við afgreiðum ekki mál á Alþingi, sem dæmi lokafjárlög, eins og við ræddum á fundi fjárlaganefndar í hádeginu, öðruvísi en með fyrirvara um þá ábyrgð sem hvílir á þeim sem fóru með þau mál á þeim tíma, að við samþykkjum ekki mál tengd ríkisrekstrinum öðruvísi en með fyrirvara um að hægt sé að beita þeim leikreglum sem þó eru í gildi í dag og lögum varðandi ábyrgð ráðherra og forstöðumanna stofnana og starfsmanna ríkisins.