efling græna hagkerfisins.
Hæstv. forseti. Það er rétt sem fram kom hjá hv. formanni iðnaðarnefndar, þetta mál hefur fengið stuðning úr öllum flokkum. Flutningsmenn voru úr öllum flokkum og það var samstaða í iðnaðarnefnd, sem ég reyndar tek fram að ég á ekki sæti í, en það var samstaða allra flokka þar um afgreiðslu málsins, enda er þetta tillaga sem felur í sér að það verði hafin vinna sem lýtur að markmiðum sem við hljótum öll að styðja. Ég get hins vegar ekki annað en vakið athygli á því að þó að allir geti fallist á þau fögru markmið sem þarna eru sett er margt mjög óljóst í þessu máli og þarna eru settar fram mjög háleitar yfirlýsingar og háleit markmið en erfitt að festa hönd á einhverju konkret í þessu. Ég sé samt ekki ástæðu til annars en að styðja málið og geri ráð fyrir því (Forseti hringir.) að það muni flokksfélagar mínir einnig gera.