fjárlög 2011.
Virðulegi forseti. Ég deili skoðunum þingmannsins að það þurfi að efla Alþingi, en Alþingi þarf líka að þekkja sín takmörk. Ég tel t.d. að eitt mikilvægasta verkefni og aðgerð Alþingis á undanförnum mánuðum hafi verið að samþykkja að sett yrði á fót stjórnlagaþing. Við höfum sýnt ákveðið þroskamerki í því að framselja vald sem var og er betur komið hjá þjóðinni í ljósi biturrar reynslu af tilraunum til þess að endurskoða stjórnarskrána með pólitísku valdi.
Varðandi safnliðina þá tel ég einfaldlega að það séu aðrir aðilar í samfélaginu hæfari en við þingmenn til þess að taka ákvarðanir með hvaða hætti eigi að útdeila styrkjum til fræðslu og menningarstarfsemi í landinu. Þar eigum við líka að hafa vit til þess að stíga til hliðar og láta þá sem betur þekkja til sjá um (Forseti hringir.) slíkar ákvarðanir.