fjárlög 2011.
Frú forseti. Það fjárlagafrumvarp sem hér kemur til atkvæðagreiðslu er eitt mikilvægasta innlegg ríkisstjórnarinnar til að hífa þjóðina upp úr þeirri efnahagslægð sem hún hefur ratað í. (Gripið fram í: Heyr, heyr.) En því miður hefur henni algjörlega brugðist bogalistin í að setja saman slíkt frumvarp sem gefur fólki von, blæs fólki trú í brjóst um að okkur muni takast á komandi missirum að vinna bug á efnahagsvandanum vegna þess að ríkisstjórnin hefur valið leið skattahækkana, enn og aftur. Í fjáraukalagafrumvarpinu sem við erum nýbúin að afgreiða þurftum við að lækka tekjurnar sem gert hafði verið ráð fyrir að mundu skila sér í ríkiskassann fyrir yfirstandandi ár. Það sama mun gerast á næsta ári, það sýna hagvaxtarspárnar. Við munum í þessari atkvæðagreiðslu leggja fram tillögur um að fara aðra leið, fara leið lágmarksálagningar á fyrirtækin (Forseti hringir.) og heimilin og á sama tíma standa fyrir ábyrgum, nauðsynlegum niðurskurði í ríkisrekstrinum. Við verðum að loka fjárlagagatinu en við verðum að gera það með öðrum hætti en ríkisstjórnin leggur til.