samningar um ábyrgð á endurgreiðslu Tryggingarsjóðs innstæðueigenda til breska og hollenska ríkisins.
Frú forseti. Ég fagna ábendingu hv. þm. Þórunnar Sveinbjarnardóttur vegna þess að þetta er að mínu mati grafalvarlegt mál. Það liggur fyrir undirskrifað samkomulag forseta Alþingis og formanna þingflokka á Alþingi um með hvaða hætti skuli vinna Icesave-málið. Formaður fjárlaganefndar kýs að rjúfa það samkomulag með þegjandi samþykki formanna annarra þingflokka nema hv. þm. Margrétar Tryggvadóttur og með þegjandi samþykki forseta Alþingis og skipa fjárlaganefnd til verka í jólahléi þingsins á sama tíma og hún sjálf hugðist vera fjarverandi.
Mér finnst þetta svo alvarleg og svo einkennileg staða að ég tel fyllilega réttlætanlegt að það komi fram í umræðu á þinginu og í nefndaráliti. Ég tel það svo alvarlegt að við höfum sent ábendingu um þetta til annarra handhafa forsetavalds og til forseta Íslands, því að Alþingi á ekki og síst af öllu forseti Alþingis að mínu mati — það getur verið að aðrir telji það í lagi en ég tel það ekki í lagi — að ganga fram hjá og rifta undirskrifuðu samkomulagi sem fólk hefur gert.