losun gróðurhúsalofttegunda.

Forseti. Ég þakka hv. þingmanni fyrirspurn hennar og lýsi yfir mikilli ánægju og aðdáun á þeirri vinnu sem hv. þingmaður lagði í nefndarálit sitt. Það er gríðarlega yfirgripsmikið og ítarlegt og í rauninni er hægt að hafa af því mjög mikið gagn þó að ég sé ekki endilega sammála niðurstöðunni. Í þessu liggur mjög mikil og góð vinna og ber að fagna því og þakka fyrir það sérstaklega.

Það kom mér ekkert gríðarlega á óvart að hv. þingmaður ætti ekki samleið með okkur í meiri hlutanum í umhverfisnefnd því að hv. þingmaður er meiri samvinnumaður í sér, kemur af því svæði landsins og á rætur þar. Ég hef hins vegar þá trú að það eigi eftir að breytast þegar hún sér árangurinn af því starfi sem hinn frjálsi markaður mun vinna í þessu kerfi. Í það minnsta tel ég að við hv. þingmaður deilum í grunninn sýn á fiskveiðistjórnarkerfið. Þar er ágætisreynsla af því.

Varðandi þær spurningar sem hv. þingmaður beindi til mín um innanlandsflugið og stóriðjuna, er það vissulega ósanngjarnt að þurfa að leggja sérstaka skatta á okkur í svona tilfellum. Ég hef sagt það sjálfur að stjórnvöld hafa dregið úr annars staðar á hverjum tíma til þess að mæta ósanngjarnri skattlagningu, ef þær áherslur eru uppi. Ég skal ekki segja til um hvort við eigum hættu á að fá það sem hv. þingmaður kallar stóriðjuleka út úr Evrópusambandinu og frá Íslandi. Ég hef ekki stórar áhyggjur af því vegna þess að ég tel að umhverfi fyrirtækja í Vestur-Evrópu sé á margan hátt mun betra, bæði starfsmönnum og eigendum fyrirtækja, en á öðrum samkeppnissvæðum landsins. Ég held að yfirburðir okkar þar (Forseti hringir.) séu töluverðir.