Stjórnarráð Íslands.
Virðulegi forseti. Ég skal bara reyna að svara eins heiðarlega og ég get. Mér er ekki kunnugt um að svo langt hafi verið komið að hugmyndir um frekari sameiningar ráðuneyta í tíð síðustu ríkisstjórnar hafi verið komnar í tillöguform. En það er alveg rétt, menn voru með augun opin fyrir því að skoða þessi mál. Á sínum tíma, þegar sjávarútvegs- og landbúnaðarráðuneytið varð til, varð líka frekari uppstokkun. Þá fóru t.d. landbúnaðarskólarnir frá ráðuneytinu til menntamálaráðuneytisins. Ég taldi það eðlilegt. Þegar ég horfi núna í baksýnisspegilinn set ég hins vegar meiri spurningar við það þegar við tókum bæði Skógræktina og Landgræðsluna frá sjávarútvegs- og landbúnaðarráðuneytinu og settum í umhverfisráðuneytið. Þó var sá munur á að gert var ráð fyrir því að landshlutaræktunin og bændaskógarnir yrðu áfram hjá landbúnaðarráðuneytinu. Það má því segja að við fórum í býsna mikla uppstokkun. Mér fyndist mjög áhugavert að farið væri í þessi mál með einhverjum (Forseti hringir.) skipulegum hætti þar sem stofnanasamsetningin á bak við ráðuneyti væri líka skoðuð.