skuldavandi vegna verðtryggðra lána.
Hæstv. forseti. Ég held að þessi mál hljóti öll að vera til skoðunar öllum stundum, hvernig við getum komið til móts við það fólk og þær fjölskyldur sem eiga í vanda vegna mikilla skulda og eru að missa eignir sínar af þeim sökum. Ekki eru neinar ákveðnar aðgerðir á vinnsluborðinu hvað það snertir núna. Hins vegar höfum við verið með á vinnuborði ríkisstjórnarinnar leiðir til að létta skuldavandanum og verið að líta til ýmissa þátta hvað það snertir. Ég held að við hljótum öll að vera sammála um það í þessum sal að engar almennar patentlausnir eru á þeim málum en ég vil taka undir með hv. þingmanni að ef við getum sameinast eða fundið leiðir til að létta á vanda þeirra sem í hlut eiga þá er ég og mitt ráðuneyti opið fyrir slíku. Ég auglýsi eftir því að fá slíkar hugmyndir upp á borðið. Við erum stöðugt með þessi mál í skoðun og endurskoðun og ég held að það eigi við um þingheim allan. Þetta er ekki flokkspólitískt mál í því tilliti heldur þverpólitískt og ég lýsi því einfaldlega yfir að við erum opin fyrir öllum góðum hugmyndum hvað þetta snertir.