fjárlög 2014.

Hæstv. forseti. Ég vil óska hv. formanni fjárlaganefndar til hamingju með að flytja hér nefndarálit til 2. umr. Ég verð að viðurkenna að manni bregður við þegar lagt er út í faglega og málefnalega umræðu sem á eftir að standa í einhverja daga með þeim orðum að hér hafi verið hömlulaus útgjöld á síðustu fjórum árum — hömlulaus útgjöld — þegar farið hefur verið úr 14% halla á landsframleiðslu niður í 1%. Talað er um að menn hafi tekið við villandi búi, hvað sem það þýðir, að tekjuáætlun á þessu ári hafi verið byggð á lofti og verið innihaldslaus með öllu, eins og hér er sagt. Ég verð að biðjast undan svona málflutningi í sambandi við fjárlög. Það að beitt hafi verið flötum niðurskurði virðist vera eins konar mantra þegar menn eru að fara í gegnum einstaka þætti og orð eins og að „fresta tækjakaupum“ eru notuð þegar það hefur orðið aukning — ekki nema hv. þingmaður hafi verið að tala um ástandið fyrir síðustu ríkisstjórn?

Það eru nokkur atriði sem mig langar að spyrja um. Í fyrsta lagi langar mig að heyra frá hv. formanni fjárlaganefndar: Hvað telur hann að sé eðlilegt hlutfall samneyslu í þjóðfélagi eins og á Íslandi af landsframleiðslu? Á Norðurlöndunum er það í kringum 48%, á Íslandi er það dottið niður í 45%, ef ég veit rétt, er einhvers staðar í kringum það. Í Bretlandi er það komið niður í 40%, enda orðið einkarekstrarsamfélag. Þetta er mismunurinn á velferðarsamfélögum og öðrum. Mig langar að heyra skoðun hv. formanns á þessu.

Svo langar mig að spyrja um heilbrigðismálin. Í fyrsta lagi eru sumar stofnanir úti á landi sem lækka í fjárlögunum; Heilbrigðisstofnun Vesturlands lækkar um 10 millj. kr. Eru einhver rök eða ástæða fyrir því? Hvernig verður farið með hallann á Landspítalanum sem er 1,5–1,8 milljarða í halla. Það á að bæta við 1.690 þúsund. Hvernig verður farið með það sem var áður? Er þetta til að borga niður hallann? Eiga þeir að mæta þessu á mörgum árum til viðbótar þeim 3 milljörðum sem voru (Forseti hringir.) á Landspítalanum áður en við tókum við?