séreignarsparnaður og ráðstöfun hans til greiðslu húsnæðislána og húsnæðissparnaðar.

Hæstv. forseti. Ég vænti þess að fá svar við þessu með þá tekjuhærri og tekjulægri og þá upphæð sem þarna er, hversu mikið maður þarf að hafa í tekjur til þess að geta nýtt sér þennan séreignarsparnað að fullu.

Í allri umfjöllun hæstv. ríkisstjórnar og raunar fyrrverandi ríkisstjórnar líka hafa menn sett fókusinn á að jafna eigi stöðu leigjenda og eigenda á húsnæðismarkaði. Menn hafa lagt mikið upp úr því. Það eru tillögur núna frá verkefnisstjórn, frá hæstv. félags- og húsnæðismálaráðherra um að reyna að jafna þá stöðu. Eru þessar tillögur ekki í andstöðu við það, þar sem meginfókusinn er að reyna að safna sér fyrir kaupum á húsnæði? Mér finnst skipta miklu máli að menn skoði það í samhengi. Mér finnst hafa verið áberandi hjá hæstv. ríkisstjórn að vinstri höndin veit ekki hvað sú hægri er að gera þannig að menn eru ekki samstilltir í þeim ákvörðunum sem lagðar eru fram. Það kom nú fram hjá hv. framsögumanni að meginrökin í niðurstöðunni hér eru að í byrjun hafi verið búið að ákveða hver niðurstaðan ætti að vera.