ýmsar forsendur fjárlagafrumvarps 2015.
Herra forseti. Ég get svo sannarlega tekið undir þessi orð þingmannsins því að það verða vissulega dómínóáhrif þegar saumað er að mörgum stöðum af hálfu hins opinbera úti á landsbyggðinni. Það hefur þau áhrif að þá hriktir í stoðunum þegar störf sem fyrir eru í opinbera geiranum eru skorin niður eins og hv. þingmaður nefndi. Kannski á eitt stöðugildi að vera 50%, annað 70% og það segir sig sjálft að það er ekki mikill áhugi hjá fólki að binda sig yfir slíkum störfum.
Mér finnst vanta algerlega heildaryfirsýn ríkisstjórnar yfir mannlífið í þessu landi. Það er eins og menn haldi að allt sé eyland. Ef maður getur keypt sér flatskjá þá hljóti að vera allt í lagi að hækka matarkörfuna hjá manni á mánuði af því að fólk hljóti að hafa efni á því að nýta sér afslátt af sjónvarpi, hvort sem það þarf á því að halda að kaupa sér sjónvarp eða ekki. Menn verða að horfa á þessa hluti, stöðu landsbyggðarinnar, stöðu láglaunafólks, stöðu atvinnulausra í heildarsamhengi ef menn vilja ekki að hér búi, eins og hv. þm. Guðlaugur Þór Þórðarson nefndi í ræðu, tvær þjóðir í þessu landi. Það stefnir allt í að hér verði aðgreining á milli láglaunafólks og hátekjufólks, milli landsbyggðar og höfuðborgarsvæðis. Viljum við að þjóðfélagið þróist þannig að það búi margar stéttir í þessu landi? Við vinstri græn viljum það ekki og ég vona að einhverjir framsóknarmenn og vonandi sjálfstæðismenn líka geti tekið undir það.
