framboð Íslands til barnaréttarnefndar Sameinuðu þjóðanna.
Það er svo að barnaverndarnefndir kvörtuðu til velferðarráðuneytis vegna samskipta við Barnaverndarstofu. Ráðuneytið fór yfir það mál með tilteknum hætti og mér skilst að þau tilmæli sem gefin voru út í kjölfarið séu hluti af þeim trúnaðargögnum sem hér liggja frammi fyrir nefndarmenn velferðarnefndar en ekki aðra þingmenn. Það liggur líka fyrir, og fyrir því var gerð grein í þinginu af hálfu hæstv. félags- og jafnréttismálaráðherra, að þessi samskipti hefðu verið á gráu svæði. Það kom fram bæði í þingsal og væntanlega fyrir velferðarnefnd á þeim tíma.
Það upplýsti hæstv. ráðherra líka ríkisstjórnina um þegar hann gerði tillögu um þetta framboð til barnaréttarnefndar Sameinuðu þjóðanna. Nú liggur fyrir að m.a. á vettvangi velferðarnefndar Alþingis hafa komið fram spurningar um málavöxtu í þessu máli og því liggur fyrir að ég tel það skyldu mína sem forsætisráðherra að verða við ósk hæstv. félags- og jafnréttismálaráðherra um að láta fara fram óháða úttekt á öllum málavöxtum þessa máls frá því að þessar kvartanir barnaverndarnefnda bárust velferðarráðuneyti og hvernig málsmeðferð barnaverndarnefnda, Barnaverndarstofu, velferðarráðuneytis var háttað. Þessi úttekt verður unnin eins og kom raunar fram í fyrra svari við fyrirspurn hv. þm. Þórhildar Sunnu Ævarsdóttur og eins og sömuleiðis kom þar fram (Gripið fram í.) getur niðurstaða þeirrar úttektar haft áhrif á framboðið sem hv. þingmaður nefndi hér og spurði sérstaklega um.
Um þetta er algjör einhugur í ríkisstjórninni, af því að hér er spurt af hv. þingflokksformanni Miðflokksins. Ég tel mjög mikilvægt, eins og ég sagði áðan, að í þessum viðkvæma málaflokki sé vandað til verka. Þar með er ekki verið að taka fram fyrir hendurnar á Alþingi (Forseti hringir.) en það er hins vegar mjög mikilvægt að framkvæmdarvaldið láti til sín taka í þessu máli og láti þessa úttekt fara fram. Við förum yfir þær niðurstöður þegar þær liggja fyrir.