upptaka samræmdrar vísitölu neysluverðs.
Forseti. Það er nú kannski einmitt rót málsins þegar upp er staðið. Þegar við horfum til skýrslu Seðlabankans þá var niðurstaðan alveg skýr þar, Seðlabankinn taldi evruna vænlegasta kostinn; taldi síðan upp nokkra aðra kosti sem mætti skoða, en kannski næstan þar á eftir einhvers konar útgáfu af sjálfstæðri peningastefnu, en þó væri evran sennilega best. Það var reyndar athyglisvert hve lítið þingið gerði með þá skýrslu á sínum tíma. Hún var afskaplega lítið rædd. Seðlabankinn var í raun að varpa boltanum yfir til stjórnmálanna sem einfaldlega gripu hann ekki, tóku ekki við honum og málið koðnaði bara niður.
Nú eigum við von á annarri skýrslu, eða vinnu sem sett var af stað í tíð síðustu ríkisstjórnar, um möguleika hvað varðar endurskoðun peningastefnunnar. Þar var reyndar undanskilinn kosturinn með evruna, enda kannski skýr niðurstaða í skýrslu Seðlabankans hvað hann varðaði. En það verður mjög áhugavert að taka umræðuna um kosti og galla þeirra lausna sem þar verður vonandi að finna.