frumvarp um persónuvernd.
Virðulegi forseti. Forsaga þessa máls er sú að árið 2016 samþykkti Evrópusambandið reglugerð um persónuvernd. Það hefur því legið fyrir að það hefur þurft að taka þessa reglugerð upp í EES-samninginn. EES-ríkin, EFTA-ríkin, eru skuldbundin til þess að taka reglugerðina upp. Ólíkt þeim gerðum sem EFTA-ríkin taka yfirleitt upp á grundvelli EES-samstarfsins er þessi gerð reglugerð, eins og ég nefni hana, ekki tilskipun. Það þýðir að reglugerðina sjálfa þarf að innleiða í EES-rétt eins og hún kemur fyrir algerlega óbreytta. Það hefur því legið ljóst fyrir frá árinu 2016 hvert efni þessarar gerðar væri. Ísland hefur haldið til haga hagsmunum sínum í þessu, hvað varðar fullveldi ríkisins í þessum efnum, og gerði athugasemd við að gert væri ráð fyrir að Ísland tæki þátt í evrópsku persónuverndarstofnuninni án atkvæðisréttar þar í stað þess að styðjast við hið svokallaða tveggja stoða kerfi sem við gerum venjulega þegar við tökum upp samstarf sem þetta á vettvangi EES.
Það gekk hins vegar eftir að fá Evrópusambandið til að fallast á að þetta væru mjög sérstakar aðstæður og það yrði ekki fordæmisgefandi í framtíðinni. Með sérstakri yfirlýsingu annarra EFTA-ríkja og framkvæmdastjórnar Evrópusambandsins féllst Ísland á að taka þátt í því að innleiða reglugerðina með þeim hætti að taka þátt í þessari evrópsku persónuverndarstofnun. Það lá ekki fyrir fyrr en um áramótin.
Hitt er annað mál að frumvarpið liggur nú nýlega fullklárað fyrir hjá dómsmálaráðuneytinu, hefur verið í kostnaðarmati hjá fjármálaráðuneytinu og í yfirlestri hjá forsætisráðuneytinu. Ég hyggst leggja það fyrir Alþingi á næstu dögum.
