NATO-þingið 2018.
Virðulegur forseti. Ég vil byrja á því að þakka hv. þm. Njáli Trausta Friðbertssyni fyrir yfirferðina á þessari skýrslu, hún er ítarleg eins og fram kom í máli hans. Hv. þm. Áslaug Arna Sigurbjörnsdóttir hjálpaði mér við hluta af því sem ég ætlaði að ræða, það er ágætt, ég get þá snúið mér að öðru.
Í skýrslunni er fjallað um fræðslu til ungmenna í löndum NATO, hvað NATO er að gera og hver sé tilgangur þess. Hvernig er þessu háttað hjá okkur? Er einhver vinna farin af stað í þessu? Ég held að það sé mjög mikilvægt fyrir okkur öll, hvort sem við erum gömul eða ung, ég tala nú ekki um þá sem taka við í framtíðinni, að menn geri sér grein fyrir því hversu mikilvægt það er fyrir okkur að vera í NATO í þeirri breyttu heimsmynd sem er fram undan.
Hv. þingmaður kom inn á alla þá umferð sem á eftir að verða norðan við okkur. Ég verð að geta þess líka að hv. þingmaður hefur verið óþreytandi í vinnu sinni við að miðla upplýsingum til okkar varðandi þá tækni sem er fram undan hvað snertir eftirlit á heimshöfunum með gervihnöttum og þess háttar. Það væri einnig fróðlegt ef hann hefði tök á að koma aðeins inn á þær hugmyndir sem hann hefur þar uppi og það sem verið er að ræða innan NATO.
