meðferð krónueigna sem háðar eru sérstökum takmörkunum og gjaldeyrismál.

Forseti. Maður veltir fyrir sér, þegar maður horfir yfir þessi mál tvö, mjög skyld mál, Arionbankamálið og svo þetta aflandskrónumál, hvort stjórnvöld séu yfir höfuð með á nótunum, hvort þau viti hvað þau eru að gera eða hvort þau láti mata sig, átti sig ekki á því hvað þau eru að gera. Láti skrifa fyrir sig frumvörp, rétt laumist inn í þingsal til að lesa frumvarpið og laumist svo inn í þingsal til að lesa nefndarálit en geti ekki mætt til leiks til að verja afstöðu sína af því að þau vita ekki alveg á hverju hún byggist. Er hugsanlegt að þetta sé afleiðing af því að stjórnvöld séu ekkert við stjórnvölinn í þessum málum? Að þau láti skammta sér niðurstöður og skýringar en þegar kallað er eftir því hvað felist í skýringunum verður fátt um svör og menn fela sig víðs vegar um húsið og þora varla að líta inn í sal — og alls ekki taka þátt í umræðunum.