samráð um samgönguáætlun.
Herra forseti. Ég þakka hæstv. ráðherra viðleitnina að boða til kynningarfundar en gagnrýni auðvitað um leið tímasetningu þess fundar sem hæstv. ráðherra mátti vera fullljóst að væri einmitt umræða í þingsal og var gagnrýnt hástöfum hér af minni hluta sem vildi vera viðstaddur þá umræðu. Ég hefði gjarnan viljað sitja þann samráðsfund en var í umræðu á sama tíma í þingsal og tel reyndar mjög óeðlilegt að verið sé að boða stóran hluta þings til kynningarfundar á þingfundartíma. Mér finnst grundvallaratriði að þingmenn eigi að geta sótt slíka fundi og sinnt störfum sínum á þingi sömuleiðis.
Um leið og ég lýsi ánægju minni með að loksins sé verið að leggja fram einhverjar hugmyndir að því hvernig tekið verði á miklum samgönguvanda á höfuðborgarsvæðinu og tryggt nægjanlegt fjármagn til þess hlýt ég að gagnrýna þá hugmynd sem hér er lagt upp með, að íbúar höfuðborgarsvæðisins eigi að greiða tvöfalt, í fyrsta lagi þau eldsneytisgjöld sem ætlað er að fjármagna framkvæmdir í samgöngukerfinu og að auki veggjöld sérstaklega sem ekki verða lögð á (Forseti hringir.) neins staðar annars staðar á landinu. Ég hlýt því að spyrja hæstv. ráðherra: Er það réttur skilningur að það sé upplegg þessarar ríkisstjórnar að íbúar höfuðborgarsvæðisins eigi að borga tvöfalt fyrir samgöngubætur sínar?
