staðan í stjórnmálunum í byrjun árs og verkefnin fram undan.

Herra forseti. Takk fyrir þetta svar. Mjög skýrt og einmitt verið að horfa til framtíðar. Það er ekki lengur hægt að líta fram hjá ákalli nýsköpunar- og sprotafyrirtæki um að gera gjaldmiðilsumhverfið betra fyrir þau. Það er í beinu samhengi við rekstur þeirra og möguleika til þess einfaldlega að lifa af á næstu misserum og árum hér heima.

Það er annað og gríðarlega mikilvægt mál sem hv. þingmaður snerti líka á í sinni ræðu. Það eru loftslagsmálin. Mig langar að vita hvort hann deili að vissu leyti með mér þeim áhyggjum sem koma upp þegar maður horfir á stjórnarflokkana tala um umhverfismálin. Við sjáum að það eru mismunandi áherslur varðandi losunarmálin, t.d. hvort við eigum að miða við 40% eins og Evrópusambandið gerir. Ég veit að innan stjórnarflokkanna, ég heyrði það bara síðast í dag, eru sumir sem telja að við eigum bara að miða við 29% losun. Ég spyr hvort þingmaðurinn deili þeim áhyggjum að það sé ekki nægilega mikil samstaða — og þá reyndar ekki nægilega mikil samstaða með m.a. umhverfisráðherra — til að fylgja eftir áformum varðandi baráttuna sem við þurfum öll að fara í varðandi loftslagsbreytingar.