fjáraukalög 2021.

Virðulegi forseti. Já, ég er sammála hv. þingmanni um að taflan er mjög athyglisverð vegna þess að hún sýnir og dregur saman heildarumfang aðgerðanna sem við höfum gripið til á undanförnum tveimur árum, árið í fyrra og í ár. Varðandi bankaskattinn sérstaklega þá hef ég alltaf verið þeirrar skoðunar að það væri rétt að láta þann tímabundna skatt — þetta var skattur sem var kynntur sem tímabundin aðgerð — renna sitt skeið og láta fjármálastarfsemina í landinu búa við almenn rekstrarskilyrði eins og önnur fyrirtæki. Hverju hefur það skilað? Ja, það skilaði auðvitað miklu betri viðnámsþrótti í fjármálakerfinu ásamt því sem Seðlabankinn gerði. Það var ekki bara bankaskattur sem var lækkaður heldur létti Seðlabankinn af fjármálakerfinu í heild sinni sveiflujöfnunaraukanum og dró úr öðrum kröfum sem gerði það að verkum að fjármálakerfið gat staðið með heimilum og fyrirtækjum. Og við höfum séð sögulega mjög lág vanskil í fjármálakerfinu, hvort sem litið er til heimila eða fyrirtækja, og lítið af stórum vandamálum.