Hálendisþjóðgarður.
Herra forseti. Þetta eru dapurleg örlög metnaðarfullra áforma og við í Samfylkingunni hefðum viljað að þetta mál yrði samþykkt. En hér erum við fyrst og fremst að greiða atkvæði um málsmeðferð og verðum þess vegna á gulu. Þegar hæstv. umhverfisráðherra [Kliður í þingsal.] var spurður um afdrif málsins sagði hann, með leyfi forseta:
„Við erum hvergi af baki dottin …“
Af því hann leyfði sér að nota myndlíkingu úr hestamennsku þá er kannski allt í lagi að halda henni áfram. Það er ekki eins og ráðherrar og félagar úr VG hafi ferðast um á vökrum hesti heldur eins og þau hafi verið að reyna að temja flóðhest, sem kunnugir segja að sé ekki hægt að temja. Þetta mál verður einfaldlega ekki klárað á næsta kjörtímabili nema Vinstri græn velji sér betra samferðafólk.