áætlun um vernd og orkunýtingu landsvæða.

Herra forseti. Ég þakka andsvarið. Sú mynd sem hv. þingmaður dregur hér upp er auðvitað kostuleg. En kannski átti þetta ekki að koma okkur svo mikið á óvart, ég rifja bara upp að undir lok síðasta þings var mál í meðförum þingsins í umhverfis- og samgöngunefnd, þar sem ég átti sæti, sem voru ný fjarskiptalög, stjórnarfrumvarp. Það var mál sem þurfti að klára. Það var býsna margt í þessu Mílumálshavaríi sem tengdist því að það mál var ekki klárað á síðasta þingi. Hvernig kom það nú til að það mál kláraðist ekki? Það var ekki út af viðspyrnu stjórnarandstöðuflokkanna. Stjórnarandstöðuflokkarnir má segja að hafi bara verið í öllum meginatriðum býsna sáttir við það hvernig málið leit orðið út. Nei, það dó af því að Vinstri grænir, samkvæmt þeim upplýsingum sem þingmönnum bárust, stoppuðu málið á lokametrunum. Stjórnarfrumvarp, frumvarp sem Vinstri grænir voru búnir að samþykkja í ríkisstjórn og þingflokki en svo á lokametrunum dó það drottni sínum án þess að það fengist nokkurn tímann almennilega útskýrt hvers vegna það var.

Í því ljósi má kannski segja að þetta sé bara meira af því sama og við sátum undir á liðnu kjörtímabili. Málum sem flokkarnir koma sér ekki saman um er einhvern veginn hent út úr ríkisstjórninni. Þar nenna ráðherrarnir ekki þessu veseni og svo fara málin inn í þingflokkana. Þar eru gerðir einhverjir óljósir fyrirvarar eins og síðbúnir fyrirvarar Framsóknarflokksins við hálendisþjóðgarðinn á sínum tíma. En ég man samt ekki eftir því að þinginu hafi verið falið að aðlaga mál ríkisstjórnarinnar að stefnu ríkisstjórnar. Það kannast ég ekki við.