skilameðferð lánastofnana og verðbréfafyrirtækja o.fl.
Herra forseti. Ég þakka hv. þingmanni fyrir svarið sem ég er pínulítið sammála. Nú er ég lögfræðingur sjálf og það er alltaf mikið vandræðamál þegar löggjafinn treystir því að ummæli í greinargerð með máli bæti upp fyrir göt eða annað eða bara einhver allt önnur fyrirmæli sem koma síðan fram í lagatextanum sjálfum, af því það er nú þannig í okkar kerfi að það er lagatextinn sem gildir. Hitt er bara til nánari skýringar, ekki til að bæta við reglum eða fylla upp í göt eða annað. Þetta vekur upp áhyggjur hjá mér, ekki síst vegna þess að það var annað atriði sem var nefnt í umsögn TIF um að það þyrfti að koma fram í lagaákvæðinu ákveðnir þættir, og þá er ég er að tala um fyrstu athugasemd TIF. Viðbrögð ráðuneytisins við þeim athugasemdum þar sem er óskað eftir tilgreiningu í lagaákvæðinu eru einmitt að bæta við skýringartextann í greinargerð. (Forseti hringir.) Ég get sagt sem lögfræðingur að þetta er sannarlega ekki nóg, (Forseti hringir.) þannig að ég ítreka spurningu mína til hv. þingmanns: Telur hann lagatextann eins og hann er duga til?
