staðfesting samninga Íslands um afmörkun landgrunnsins handan 200 sjómílna.
Frú forseti. Ég get ekki lofað jafn skemmtilegri umræðu undir þessu máli og hér hefur farið fram, en ég gæti reyndar komið með sögustund af Vestmannaeyjagosinu út frá tengdamóður minni og tengdafjölskyldu sem bjó öll í Eyjum fyrir gos en fór ekki til baka, sjö systkinin.
En, frú forseti, hér mæli ég fyrir hönd utanríkismálanefndar fyrir nefndaráliti um staðfestingu samninga Íslands við Noreg annars vegar og Danmörku fyrir hönd Færeyja hins vegar um afmörkun landgrunnsins handan 200 sjómílna á svæðinu milli Færeyja, Íslands, meginlands Noregs og Jan Mayen (Síldarsmugan).
Með tillögunni er leitað heimildar Alþingis til staðfestingar á þessum tveimur samningum sem undirritaðir voru í Stokkhólmi 30. október 2019. Ísland skilaði inn greinargerð til landgrunnsnefndar Sameinuðu þjóðanna í apríl 2009 um ytri mörk íslenska landgrunnsins utan 200 sjómílna. Landgrunnsnefndin féllst að fullu á kröfur varðandi Ægisdjúp í suðurhluta Síldarsmugunnar í samræmi við greinargerð Íslands og er því meðferð nefndarinnar hvað þetta svæði varðar formlega lokið. Afmörkun landgrunnsins á vestur- og suðurhluta Reykjaneshryggjar er enn þá til meðferðar fyrir landgrunnsnefndinni og var endurskoðaðri greinargerð um þann hluta landgrunnsins skilað til nefndarinnar í mars 2021. Áður en greinargerðinni var skilað inn árið 2009 var gengið til samninga við Noreg og Danmörku, fyrir hönd Færeyja, um skiptingu landgrunnsins á svæðinu. Landgrunnsnefndin getur ekki tekið afstöðu til umdeildra svæða og var því talið rétt að ljúka fyrst samningagerðinni. Haustið 2006 náðist samkomulag milli ríkjanna þriggja. Þegar tillögur landgrunnsnefndarinnar lágu fyrir var gengið frá formlegum samningum í samræmi við fyrrnefnt samkomulag með undirritun þeirra 30. október 2019.
Vert er að taka fram að vegna samsetningar hafsbotnsins á svæðinu er ólíklegt að þar sé að finna vetniskolefnislög eða aðrar jarðefnaauðlindir. Einnig er rétt að árétta að samningarnir fjalla einungis um skiptingu landgrunnsins, þ.e. hafsbotnsins, og taka ekki að neinu leyti til fiskveiða á svæðinu.
Nefndin fjallaði um málið og fékk á sinn fund gesti sem greint er frá í nefndaráliti sem liggur frammi. Að því sögðu leggur nefndin til að þingsályktunartillagan verði samþykkt.
