Verðbólga, vextir og staða heimilanna.
Frú forseti. Ég vil þakka málshefjanda fyrir að hefja þessa umræðu og hæstv. ráðherra fyrir sitt innlegg og góð svör. Það er auðvitað þannig að hér hefur ýmislegt gengið á eins og um allan heim á síðustu árum. Við höfum farið í gegnum alheimsfaraldur og nú stríð í Evrópu og það hefur áhrif. Þetta hefur haft áhrif á heimilin í landinu og þetta hefur haft áhrif á almenning. Við vitum að með hækkun stýrivaxta er Seðlabankinn að reyna að hafa áhrif á heildareftirspurn í hagkerfinu og að lokum auðvitað verðbólguna. En með öruggri stjórn ríkisfjármála er ríkissjóður, eins og komið hefur fram, betur í stakk búinn til að takast á við þetta efnahagslega högg.
Hann veldur manni vissulega einhverjum áhyggjum, eins og hefur reyndar komið fram í máli annarra þingmanna, þessi hópur sem nýtti sér lágvaxtaumhverfið sem við gengum nýlega í gegnum en vonandi horfum við aftur á þá fyrri stöðu. Það fólk horfist nú í augu við mun hærri greiðslubyrði en það gerði fyrir örfáum mánuðum. Það er staðan sem við stöndum frammi fyrir. En eins og hæstv. ráðherra kom reyndar inn á í svari sínu er önnur tegund lána, sem eru verðtryggð lán, með lægri greiðslubyrði og geta þau að einhverju leyti gripið inn í þróun mála hjá þessum hópi.
Það væri áhugavert að vita hvort búið sé að greina þann hóp sem er að lenda í greiðsluvanda, eða á mögulega á hættu að lenda í því, og jafnframt hversu stór hópur tók óverðtryggð húsnæðislán á árunum 2019–2021.