fjárlög 2023.

Virðulegi forseti. Ég þakka fyrir þessa spurningu og eðlilegt að spurt sé af hverju meiri hlutinn kom ekki með þessa breytingartillögu. Ég vil minna á að við höfum, meiri hluti fjárlaganefndar, á undanförnum tveimur eða þremur árum lagt fyrir þingið breytingartillögur til þess að reyna að jafna þennan dreifikostnað og sannast sagna hefur árangurinn ekkert verið glæsilegur í því. Það er ekki vegna þess að ekki hafi verið vilji til þess að ganga þessa leið eða fylla upp í þetta gat. Orkunotkun, endurbyggingarþörf og fleiri þættir í tekjumarkamódelinu eru með þeim hætti að við náum, held ég, þessu markmiði ekki án kerfisbreytinga, ekki með því að bæta stöðugt í niðurgreiðslur úr ríkissjóði. Það sem ég er að segja er að við þurfum að taka tekjumörkin sjálf, hvernig þau eru undirbyggð, og endurmeta þau og nota breytingar á eignarhaldi Landsnets til að vinna með þær breytingar. Ástæðan fyrir því að við komum ekki með 300–400 milljóna hækkun núna er ekki síst sú að svona getur þetta ekki gengið áfram, við þurfum kerfisbreytingu þarna til að ná þessum markmiðum okkar en ekki bara peninga.