fjárlög 2024.
Frú forseti. Ég vil þakka hv. þingmanni fyrir ræðuna. Það er víða hægt að koma við en maður hefur stuttan tíma og ég held að við ræðum þetta betur í nefndinni í haust. En ég held að vaxtakostnaður almennt hjá ríkinu sé á betri stað en við höfum séð hann yfir lengri tíma. Það er náttúrlega verið reikna þetta núna með nýjum hætti og setja upp í fjárlagafrumvarpinu nákvæmlega með þeim hætti sem var rætt hér fyrr í dag af fjármálaráðherra í hans svörum. Þannig að við getum ekki tekið það með sama hætti kannski og við höfum verið að gera áður í samanburði. Það er kannski svolítið flókið að fara í þetta á stuttum tíma en mér finnst, í örstuttu máli, það sem vantar kannski almennt í stærra samhengi þegar við erum að ræða fjármál ríkisins og efnahagsmál á Íslandi að það þurfi að ræða það í einhverju sögulegu samhengi. Við getum aðeins byrjað: WOW féll 2019, heimsfaraldur í mars 2020 og svo Úkraínustríðið fyrir einu og hálfu ári. Þetta eru rosaleg áföll í samhengi hluta. (Forseti hringir.) Ég held að við þurfum einhvern veginn að ná þessari umræðu svolítið lengra og dýpra, hvernig hlutir eru að gerast í tengslum við þetta. En ég held áfram hér rétt á eftir.