03.05.1977
Sameinað þing: 84. fundur, 98. löggjafarþing.
Sjá dálk 4174 í B-deild Alþingistíðinda. (3237)
214. mál, endurskoðun á opinberri atvinnu- og þjónustustarfsemi
Sighvatur Björgvinsson:
Herra forseti. Ég held að við þm. þekkjum allir máltækið, að þegar stórt er spurt verður oft lítið um svör. Ég tel að nú hafi verið samið nýtt máltæki: „Þegar lítið er spurt verður oft stórt um svör.“ Ég vildi gjarnan spyrja hæstv. fjmrh. að því, hvort ætlunin sé að ræða ríkisreikning hér í fsp.-tíma á Alþ., þegar óbreyttir þm. hafa aðeins tvær mínútur til umráða en hæstv. ráðh. ótakmarkaðan ræðutíma. Ég ætla ekki að orðlengja þessa spurningu mína því að ég held að ég sé búinn eða um það bil að verða búinn með þann ræðutíma sem mér er ætlaður undir þessum kringumstæðum.
