05.11.1984
Sameinað þing: 14. fundur, 107. löggjafarþing.
Sjá dálk 733 í B-deild Alþingistíðinda. (485)

Varamenn taka þingsæti - rannsókn kjörbréfs

Forseti (Þorv. Garðar Kristjánsson):

Forseta hefur borist svohljóðandi bréf:

„Alþingi, 1. nóv. 1984.

Tómas Árnason, 4. þm. Austurl., hefur ritað mér á þessa leið:

„Þar sem ég er á förum til útlanda í opinberum erindum og get því ekki sótt þingfundi á næstunni leyfi ég mér með skírskotun til 130. gr. laga um kosningar til Alþingis að óska þess, að 1. varamaður Framsfl. í Austurlandskjördæmi, Jón Kristjánsson félagsmálafulltrúi, Egilsstöðum, taki sæti á Alþingi í fjarveru minni.“ Þetta er yður hér með tilkynnt, herra forseti.

Salome Þorkelsdóttir,

forseti Ed.“

Jón Kristjánsson hefur áður tekið sæti á Alþingi á þessu kjörtímabili. Býð ég hann velkominn til starfa.

Þá hefur forseta borist svohljóðandi bréf:

„Alþingi, 5. nóv. 1984.

Guðrún Agnarsdóttir, 3. landsk. þm., hefur í dag ritað mér á þessa leið:

„Þar sem ég vegna sérstakra anna get ekki sótt þingfundi á næstunni leyfi ég mér með skírskotun til 130. gr. laga um kosningar til Alþingis að óska þess, að 1. varamaður landsk. þm. Samtaka um kvennalista, Málmfríður Sigurðardóttir, taki sæti á Alþingi í fjarveru minni.“

Þetta er yður hér með tilkynnt, herra forseti, með ósk um að fram fari í Sþ. rannsókn á kjörbréfi varamanns.

Ingvar Gíslason,

forseti Nd.“

Með því að Málmfríður Sigurðardóttir hefur ekki tekið sæti á Alþingi áður þarf að rannsaka kjörbréf hennar sem hér fylgir með. Ég leyfi mér að óska eftir að hv. kjörbréfanefnd taki kjörbréfið til athugunar. Á meðan er fundinum frestað í fimm mínútur. — [Fundarhlé.]