04.11.1986
Sameinað þing: 11. fundur, 109. löggjafarþing.
Sjá dálk 542 í B-deild Alþingistíðinda. (429)
99. mál, skuldabréfakaup lífeyrissjóðanna af Húsnæðisstofnun
Fyrirspyrjandi (Kristín Halldórsdóttir):
Herra forseti. Á þskj. 100 leyfi ég mér að bera fram fsp. til hæstv. fjmrh. um skuldabréfakaup lífeyrissjóðanna af Húsnæðisstofnun ríkisins. Fsp. er í þremur liðum:
„1. Hve miklu fé er áætlað að lífeyrissjóðirnir verji til kaupa á skuldabréfum af Húsnæðisstofnun ríkisins á þessu ári?
2. Hvernig verður brugðist við ef lífeyrissjóðirnir óska eftir að kaupa skuldabréf fyrir hærri upphæð af Húsnæðisstofnun en gert var ráð fyrir í lánsfjáráætlun fyrir árið 1986?
3. Verður hugsanlegri umframfjárhæð varið til útlána á vegum Húsnæðisstofnunar? Ef ekki, hvernig verður henni þá varið?"
Ég sé ekki ástæðu til að fylgja þessari fsp. úr hlaði með fleiri orðum. Spurningarnar skýra sig væntanlega sjálfar.