12.08.1912
Efri deild: 22. fundur, 23. löggjafarþing.
Sjá dálk 272 í B-deild Alþingistíðinda. (305)
91. mál, bann gegn botnvörpuveiðum
Jens Pálsson, (flm.):
Jeg held, að hinn h. 2. þm. Árn. hafi ekki tekið eftir dæmi því, er jeg gat um áður í umræðunum, að þegar ísl. fiskibátar eru að veiðum í Garðsjónum, þá hætta botnvörpungarnir þar. Þetta er eitt dæmi.
En alment hefur því verið lýst yfir þar syðra, að ef bátur hefur verið úti í því skyni að hafa gát á botnvörpungum og þeir tekið eftir því og grunað, að hann mundi vera á varðbergi til að njósna um aðfarir þeirra, þá hafa þeir venjulega verið varir um sig.
Viti þeir, að þessir menn eru tilbúnir að kæra en hver sjómaður þekkir landhelgislínuna þá gera þeir minna að brotunum.
Annars má ekki gleyma því, að oft kemur það fyrir, að fiskgöngur koma hjer inn á Sviðið og alla leið inn á innri Sviðsbrún, og eru þá miklar líkur til að fiskibátar gætu aflað mikið, en svo er alt eyðilagt af botnvörpungum, er sópa öllu burt á nokkrum dögum. Gæti frumvarpið stuðlað að því, að lögbrjótar þessir færu síður inn í landhelgi, þá væri mikið unnið.