23.02.1961
Neðri deild: 68. fundur, 81. löggjafarþing.
Sjá dálk 196 í C-deild Alþingistíðinda. (1887)
8. mál, Iðnaðarmálastofnun Íslands
Fram. (Jónas G. Rafnar):
Herra forseti. Enda þótt Iðnaðarmálastofnun Íslands hafi nú verið við lýði í nokkur ár, er engin löggjöf til um skipun stofnunarinnar og starfssvið. Iðnmrh. hefur þó tvívegis, árin 1955 og 1957, gefið út reglur fyrir stofnunina til þess að haga störfum sínum eftir, þar til sett yrðu um hana sérstök lög. Til þessa hefur þeim reglum verið fylgt.
Í fyrrasumar fór hæstv. iðnmrh. þess á leit við stjórn Iðnaðarmálastofnunarinnar, að samið yrði á hennar vegum frv. til laga fyrir stofnunina. Ætti þá sérstaklega að taka til athugunar, hvort ekki væri rétt að veita bæði Alþýðusambandi Íslands og Vinnuveitendasambandinu aðild að stjórn hennar, en samkvæmt gildandi reglum hefur hvorugt þessara heildarsamtaka átt fulltrúa í stjórninni.
Frv. það, sem nú er til umr. og iðnn. hefur haft til athugunar, er samið í iðnmrn. á grundvelli tillagna stjórnar Iðnaðarmálastofnunarinnar, með nokkrum breytingum, eins og fram er tekið í grg. Með frv. þessu, ef að lögum verður, er grundvöllurinn lagður að framtíðarskipun Iðnaðarmálastofnunarinnar.
Í 2. gr. frv. er kveðið á um stjórn hennar. Þar er sú breyting á gerð frá gildandi starfsreglum, sem settar voru af ráðh. 29. maí 1957, að Alþýðusamband Íslands og Vinnuveitendasamband Íslands skuli hvort um sig tilnefna einn mann í stjórn stofnunarinnar. Verður stjórnin þannig skipuð sjö mönnum samkv. tilnefningu ákveðinna félagasamtaka, auk formanns, sem skipaður er af þeim ráðh., sem fer með iðnaðarmál. Má telja þá breytingu eðlilega, þar sem innan þessara stóru samtaka eru ýmsir, sem eiga ekki heima hjá þeim aðilum, sem tilnefnt hafa og tilnefna fulltrúa í stjórnina, en hafa verulegra hagsmuna að gæta varðandi starfsemi Iðnaðarmálastofnunarinnar og koma til með að þurfa að leita til hennar með ýmis áhugamál sín.
4. og 5. gr. frv. fjalla um starfssvið og verkefni Iðnaðarmálastofnunarinnar, og leyfi ég mér í því sambandi að vísa til grg., sem frv. fylgir. Í 4. og 8. gr. frv. er gert ráð fyrir því, að ráðh. setji með reglugerð nánari ákvæði um framkvæmd laganna. Frv. var til umræðu hér á hv. Alþingi í fyrra. Var það afgreitt frá Nd. og iðnn. Ed. mælti með því óbreyttu. Frv. var þá sent nokkrum aðilum til umsagnar. Í álitsgerðunum kom fram nokkur ágreiningur um 2. grein frv., þ.e.a.s. aðildina að stjórn stofnunarinnar, en að öðru leyti má segja, að allir hafi efnislega mælt með samþykkt frv. Í áliti Félags íslenzkra iðnrekenda kom það m.a. fram, að það taldi, að iðnaðurinn sem slíkur ætti að hafa meiri áhrif varðandi stjórn stofnunarinnar. Þá bárust n. tilmæli um það frá Iðju, félagi verksmiðjufólks í Reykjavík, Landssambandi íslenzkra verzlunarmanna og Kaupmannasambandinu, að þessi samtök fengju fulltrúa í stjórn stofnunarinnar.
Um það geta vart verið skiptar skoðanir, eð rétt sé að setja löggjöf um Iðnaðarmálastofnunina. Hún hefur fjöldamörgum verkefnum að gegna, og mun engum blandast hugur um, að starfssvið hennar eigi eftir að færast út á komandi árum. Síðan stofnunin tók til starfa, hefur hún fengið framlög á fjárlögum til þess að standa undir starfsemi sinni. Árið 1953 voru í þessu skyni veittar 450 þús. kr., og í ár eru á fjárlögum til hennar 1 millj. og 85 þús. kr.
Iðnn. mælir með samþykkt frv., en einstakir nefndarmenn áskilja sér rétt til þess að flytja og fylgja brtt. Ég legg svo til, herra forseti, að frv. verði vísað til 3. umr. að lokinni þessari umræðu.
