28.04.1977
Efri deild: 67. fundur, 98. löggjafarþing.
Sjá dálk 3871 í B-deild Alþingistíðinda. (2829)
176. mál, brunavarnir og brunamál
Iðnrh. (Gunnar Thoroddsen):
Herra forseti. Ég flyt hér viðaukatill. við þetta frv. á þskj. 545. Í gildandi lögum er svo ákveðið, að stjórn Brunamálastofnunar ríkisins skuli skipuð 5 mönnum til fjögurra ára í senn. Ráðh. skipar formann án tilnefningar, einn mann eftir tilnefningu Sambands ísl. sveitarfélaga, einn eftir tilnefningu Reykjavíkurborgar, tvo menn eftir tilnefningu Sambands ísl. tryggingafélaga.
Nú hafa komið tilmæli frá Landssambandi slökkviliðsmanna um að fá fulltrúa í stjórn Brunamálastofnunar. Í Landssambandinu eru alls um 1400 slökkviliðsmenn, og virðist mér eðlilegt og sanngjarnt að verða við þessari beiðni Landssambandsins. Brtt. mín á þskj. 545 felur því í sér að bæta einum manni við í stjórn Brunamálastofnunar og að hann verði skipaður samkv. tilnefningu Landssambands slökkviliðsmanna. Ég vænti þess, að hv. dm. geti fallist á að rétt sé að verða við þessari ósk og að till. fái góðan byr.