28.04.1977
Efri deild: 71. fundur, 98. löggjafarþing.
Sjá dálk 3878 í B-deild Alþingistíðinda. (2853)
228. mál, sala hlutabréfa í Íslensku matvælamiðstöðinni hf.
Frsm. (Jón Helgason):
Herra forseti. Fjh.- og viðskn. hefur fjallað um frv. til 1. um heimild til sölu hlutabréfa í Íslensku matvælamiðstöðinni hf. til erlendra aðila og leggur til að frv. verði samþykkt. Það kom fram við 1. umr. málsins að þetta hlutafélag hefur ekki starfað neitt í mörg ár og eignir þess eru harla litlar, þar sem það hafði, á meðan það annaðist rekstur, safnað miklum skuldum. Þær hafa að vísu lækkað nokkuð, þar sem það gat leigt húsnæði það sem það starfaði í og gekk leigugjaldið til greiðslu á þeim skuldum. Nú eru aðeins tvö ár þangað til þessi leigusamningur rennur út, en verði hlutabréfin seld núna mun vegna þessa leigusamnings fást nokkuð fyrir þau. Mun þá fást að mestu eða öllu leyti endurgreitt það sem tapaðist á rekstrinum fyrstu árin. Það er þess vegna sem farið er nú fram á það að fá heimild til að selja hlutabréfin til erlendra aðila.
