Heimsókn forseta Alþingis í breska þingið
Birgir Ármannsson, forseti Alþingis, heimsótti breska þingið í dag í boði Lindsey Hoyle, forseta neðri málstofu. Á fundi þeirra bar hæst samskipti þjóðþinganna og það sem efst er á baugi í þingstörfum og stjórnmálum í löndunum. Þá átti forseti Alþingis fund með forseta lávarðadeildarinnar, John Francis McFall baróni af Alcluith.
Á dagskrá heimsóknar voru einnig fundir með þingmönnum í vinahópi Íslands á breska þinginu og Bretlandsdeild alþjóðaþingmannasambandsins þar sem m.a. var rætt um alþjóðastarf þjóðþinga og áskoranir í alþjóðastjórnmálum.
Birgir Ármannsson, forseti Alþingis, og Lindsey Hoyle, forseti neðri málstofu breska þingsins.
Birgir Ármannsson hitti einnig forseta lávarðadeildarinnar, John Francis McFall barón af Alcluith.
Birgir Ármannsson, forseti Alþingis, og Ragna Árnadóttir, skrifstofustjóri Alþingis, hittu einnig Bretlandsdeild alþjóðaþingmannasambandsins.