skýrsla þingmannanefndar til að fjalla um skýrslu rannsóknarnefndar Alþingis.
Virðulegi forseti. Ég þakka hv. þm. Unni Brá Konráðsdóttur fyrir mjög gott yfirlit og ekki síst fyrir þann bjarta tón sem hún sló í lok ræðu sinnar sem ég held að sé okkur öllum mjög hollur og góður í dag.
Mig langar til að gera að umræðuefni og spyrja hv. þingmann út í tvo af þeim liðum sem eru í tillögu til þingsályktunar þar sem annars vegar stendur, með leyfi forseta:
„Alþingi ályktar að brýnt sé að starfshættir þingsins verði teknir til endurskoðunar.“ — Og aðeins síðar kemur: — „Alþingi ályktar að skýrsla rannsóknarnefndar Alþingis sé áfellisdómur yfir stjórnvöldum, stjórnmálamönnum og stjórnsýslu, verklagi og skorti á formfestu.“
Ég verð að viðurkenna að mér eru þessir starfshættir, verklag og skortur á formfestu afar ofarlega í huga og langar til að spyrja hv. þingmann hvort það hafi komið til umræðu í nefndinni hvernig við í raun og veru stígum næstu skref til að það geti orðið að veruleika, að við lögum þetta.