LÍN og námsmenn erlendis.
Herra forseti. Já, það er rétt, að mörgu er að hyggja þegar til lengri tíma er litið varðandi sjóðinn. Ég held að í þrengingunum sem við erum í muni álagið á sjóðinn aukast verulega og við verðum að hafa það hugfast nú þegar við förum í frekari stefnumótun gagnvart honum. Ég held að sjóðurinn verði að hafa ákveðið svigrúm til þess að taka á móti aukinni aðsókn — við sjáum strax merki í þá veru — í skólana, bæði háskólana en ekki síður framhaldsskólana. Ég tel að Alþingi hafi borið gæfa til að afgreiða þau lög sem voru samþykkt núna um framhaldsskólana.
Aukin aðsókn er í starfsnám, í iðnnám, og það þýðir að ákveðnar álögur leggjast þá á LÍN því ákveðinn hluti iðnmenntunar er lánshæfur. Yfir þetta allt verðum við að fara, við verðum að gera fólkinu okkar kleift að komast í nám og fjárfesta þannig í framtíðinni.