eiginfjárframlag ríkisins í Landsbankanum.
Frú forseti. Það er leitt að hæstv. forsætisráðherra skuli ekki enn hafa haft fyrir því að kynna sér hvað fram fór í Noregi en hún fær upplýsingar um það á eftir, enda sáum við á hvaða stigi þekking hæstv. forsætisráðherra var á því máli í snubbóttum tölvupósti sem hún sendi kollega sínum úti.
Það er merkilegt að hæstv. forsætisráðherra skuli ekki þekkja þetta fyrirkomulag á greiðslum til gamla Landsbankans vegna þess að ráðherrann ásamt fleiri ráðherrum hafa farið mikinn í fjölmiðlum og lýst því hversu ánægjulegt það sé að innheimtur verði nú miklu meiri en ráð var gert fyrir. Hér er um að ræða spurningu og óvissu upp á hundruð milljarða kr. og hæstv. forsætisráðherra hefur ekki haft fyrir því að kynna sér þá óvissu en er engu að síður reiðubúin að birtast um allt í fjölmiðlum og halda því fram að endurheimtur verði miklu meiri en búist var við.