mælingar á dilkakjöti og beitarrannsóknir í Skutulsfirði.
Virðulegi forseti. Ég þakka þessa fyrirspurn. Aldrei ræðum við of oft um eftirlitsiðnaðinn sem var lögleiddur hér um leið og EES-samningurinn samkvæmt uppskrift Evrópusambandsins og hefur brugðist okkur Íslendingum í einu og öllu.
Það kom fram í máli hæstv. sjávarútvegs- og landbúnaðarráðherra að ríkið væri ekki bótaskylt vegna þeirrar mengunar sem átti sér stað þarna fyrir vestan. Ég verð að viðurkenna að hæstv. sjávarútvegs- og landbúnaðarráðherra virðist ekki vera vel að sér í skaðabótareglum íslenska ríkisins, hvorki í þessu máli né öðru, vegna þess að Umhverfisstofnun átti að hafa eftirlit með sorpbrennslunni og var þar að auki búin að veita undanþáguákvæði á brennsluna til að starfa. Ríkisstofnunin Umhverfisstofnun sem starfar samkvæmt lögum frá Alþingi ber að sjálfsögðu þarna ábyrgð.
Ég kalla eftir því að einhverjir einstaklingar innan stofnunarinnar verði annaðhvort færðir til í starfi eða þeim hreinlega gert að víkja (Forseti hringir.) því að þarna er Umhverfisstofnun sem ríkisstofnun klárlega búin að baka sér mikla skaðabótaskyldu fyrir íslenska ríkið.
