rannsókn á einkavæðingu banka.
Virðulegi forseti. Ég þakka hv. þm. Pétri H. Blöndal kærlega fyrir þessa fyrirspurn.
Ef mig misminnir ekki tel ég víst að við höfum nú þegar samþykkt að fram fari rannsókn á sparisjóðunum og ég man ekki betur en það hafi verið fyrir ekki margt löngu og sú rannsókn sé komin vel á veg. Það má því segja að það sé í eðlilegum farvegi.
Varðandi hina spurninguna sem þingmaðurinn spurði að, um það ferli sem fór í gang hér eftir hrun og hann kallar hina síðari einkavæðingu — ég er honum ekki sammála um að það sé einkavæðing í sama skilningi og sú sem hér er undir því að þar er um að ræða eign sem í raun réttri er ekki í eign ríkisins sem færð er í hendur kröfuhöfum — en ég er honum hjartanlega sammála um að það er full ástæða til að rannsaka það ferli til hlítar. Sú nefnd sem fær þessa tillögu til meðferðar fer þá vel í gegnum það hvort þetta verði ein og sama rannsóknin eða tvær aðskildar nefndir sem skoði bæði þá einkavæðingu sem við ræðum í þessu þingskjali og það ferli sem tók við eftir hrun. Svar mitt er afdráttarlaust já við þeirri spurningu. Ég held að það sé mikilvægt að allt sé uppi á borðum varðandi það sem þar var gert og við fáum glögga mynd af atburðarásinni í því ferli sömuleiðis.