tekjustofnar sveitarfélaga.

Herra forseti. Ég held nauðsynlegt sé að taka það fram að bæði formaður hv. nefndar og framsögumaður málsins, hv. þingmenn Guðfríður Lilja Grétarsdóttir og Ólína Þorvarðardóttir, hafa báðar beðist afsökunar á þeim mistökum sem urðu við vinnslu málsins hér úr ræðustól Alþingis og enn fremur á fundi nefndarinnar og við þá sem skiluðu inn umsögn, oftar en einu sinni og oftar en tvisvar. Ég varð vitni að því í morgun á fundi nefndarinnar eins og aðrir hv. nefndarmenn sem þann fund sátu. Einum sjö sinnum komu fram afsökunarbeiðnir, held ég að ég hafi talið, á þeim fundi.

Ég held að við eigum ekki að tefja okkur lengur á því að ræða þessi mistök. Allir nefndarmenn eru sammála í því að taka málið til vandlegrar skoðunar milli 2. og 3. umr. og hefur sannarlega verið beðist velvirðingar á þessum mistökum og formaður og framsögumenn hafa tekið ábyrgð á þeim eins og hér hefur glöggt komið fram.