verslun með áfengi og tóbak o.fl.
Herra forseti. Ég vil gjarnan inna hv. þingmann eftir því hversu mikið forgangsmál þetta sé af hálfu Sjálfstæðisflokksins eða stjórnarflokkanna úr því það er haft hér fremst í röðinni. Við minnumst sum dagsins 18. janúar 2009 þegar brýnasta forgangsmál þáverandi meiri hluta á Alþingi var að ræða brennivín í búðir og Ísland logaði hérna utan við þinghúsið.
Í öðru lagi vil ég spyrja hv. þingmann út frá framsetningu hans hér áðan: Lítur hann á áfengi sem algerlega sambærilegan hlut við hverja aðra neysluvöru? Sér hann engan eðlismun á áfengi og pylsum eða kóki eða hverju sem það nú væri?
Í þriðja lagi vil ég spyrja hv. þingmann: Ef honum yrði nú að ósk sinni að brennivín færi í allar búðir, hvernig hyggst hv. þingmaður þá eftir sem áður framfylgja eða er hann kannski bara á því að eigi að leyfa versluninni að auglýsa þá vöru?