fundur í atvinnuveganefnd og umræða um rammaáætlun.
Virðulegi forseti. Það að hv. þm. Unnur Brá Konráðsdóttir líki þessum aðstæðum við aðstæður þegar þingið átt við mál eins og Evrópusambandið og Icesave sýnir kannski hvað meiri hlutinn misskilur í þessu máli. Þetta mál er algjör óþarfi. Það liggur ekkert á því. (Gripið fram í.) Það er algjörlega sjálfsagt að bíða eftir að verkefnisstjórn 3. áfanga klári vinnu sína og eiga á meðan við þau mál sem eru aðkallandi, kjaradeilur og fleira og fleira og fleira. (UBK: Var ESB ekki aðkallandi?) ESB og Icesave eru ekki sambærileg við það að sóa vikum í frekjuna í hv. 6. þm. Suðvest. Sömuleiðis til að undirstrika hvernig fundarstjórn forseta er um þetta mál og hversu lítilvægur þessi fundur á morgun átti að vera, ég geri mér grein fyrir því að hann á ekki lengur að vera, eru hér bara þriðji og fjórði á mælendaskrá tveir aðalmenn í hv. atvinnuveganefnd sem áttu þá væntanlega að taka hér til máls og eyða sínum dýrmæta (Forseti hringir.) ræðutíma í að tala um efnisatriði málsins áður en fundurinn færi fram. Það undirstrikar að engin alvara er með því að funda um þetta í hv. atvinnuveganefnd. Það undirstrikar afleita fundarstjórn virðulegs forseta.